30.08.10
Me rastin e muajit të bekuar të Ramazanit, në oragnizim të Komunës së Bajrampashës dhe me mbështetje të Komunës së Gostivarit në cilësinë e nikoqirit, të premten, nën moton “Vëllazëria nuk njeh kufij”, u shtrua iftar për rreth një mijë besimtarë myslimanë.
Përfaqësues nga Komuna e Bajampashës, ambasada e Turqisë në Maqedoni,  Komuna dhe myftinia e Gostivarit, si dhe qytetarë të shumtë u lutën dhe hëngrën iftar bashkërisht. 

 Lutjen pas iftarit e këndoi myftiu i Gostivarit Shaqir ef. Fetahu i cili më pas mbajti një fjalim rasti. “Të gjithë iftaret janë të bukur sepse janë finalja e ditës së agjëruar, por ky iftar dallon nga të tjerët sepse sonte jemi bashkë me vëllezërit tanë nga komuna e Bajrampashës. I shprehi mirënjohje komunës së Gostivarit dhe kryetarit Rufi Osmani, njëherit në emër të të gjithë qytetarëve të myftinisë së Gostivarit, falënderoj Komunën e Bajrampashës për solidaritetin e treguar”, theskoi ef. Fetahu.

Në emër të Komunës së Gostivarit dhe kryetarit Osmani, të pranishmit i përshëndeti kryetari Këshillit dr.Fadil Zendeli. “Porosia e këtij iftari të përbashkët është shumë domethënëse dhe vizionare. Ka të bëjë me miqësinë dhe vëllazërinë e Gostivarit me komunën e Bajrampashës dhe Turqinë në përgjithësi. Këto janë vlera të përbashkëta të cilat ne i kultivojmë”, theksoi mes tjerash dr.Zendeli.

Kjo ngjarje, përveç me muzikë mistike dhe popullore turke siç ishte paraparë me  agjendë, u përcoll edhe me këngë dhe valle popullore shqipe në interpretim të AKVP “Besa”, SHKA “Jahi Hasani” nga Çegrani dhe SHKA "Lulet e Malësisë".

Zyra për informime komunës së Gostivarit

Në manifestimin “Dita e piteve” i cili sivjet mbahet për herë të parë, por me synim që i njëjti të bëhet tradicional, u promovuan pite të llojllojshme, petulla, fli në saç, byrek dhe ushqime tjera nga sofra tradicionale gostivarase.

Mbi njëzet amvise nga Gostivari e rrethina, patën mundësinë që t’i dëshmojnë shkathtësitë e tyre në përgatitjen e piteve në këtë manifestim i cili pati edhe karakter garues. Komisioni i përbërë nga Shemije Elezi, Ramije Muça dhe Herolinda Aliu shpalli fituese Nadije Hebibin e cila kishte përgatitur petulica në mënyrë tradicionale.

“Dita e piteve” u organizua nga Zyra për implementimin e projekteve në bashkëpunim me Lidhjen e gruas shqiptare, ndërsa financiarisht u mbështet nga Komuna e Gostivarit.

“Ky manifestim dëshmon se Gostivari është një qytet modern i cili di të kultivojë traditën. Komuna e Gostivarit, do të vazhdojë të bashkëpunojë me organizatat joqeveritare dhe t’i mbështesë ato në misionin e tyre, gjithmonë kur ato kanë ide dhe vullnet për të bërë diçka të mirë për komunitetin. Le të jetë motoja e këtij manifestimi bukë, kripë e zemër”, tha Nita Kaprolli nga Zyra për implementim të projekteve.

Në emër të Lidhjes së Gruas Shqiptare foli Lazime Ejupi e cila falënderoi kryetarin e komunës për mbështetjen e evenimenteve të këtilla ku promovohen tradita dhe vlerat kombëtare.

Qytetarët e pranishëm, në mes të cilëve edhe kryetari i komunës prof.dr Rufi Osmani dhe kryetari i këshillit dr. Fadil Zendeli, shijuan specialitetet e përgatitura nga amviset dhe gastronomët e Gostivarit me rrethinë.

Manifestimi “Dita e piteve” u përcoll me një program të pasur kulturor dhe zbavitës. Ansambli “Besa”, shoqëritë “Jahi Hasani”, “Lulet e Malësisë” dhe “Goca e Tivarit” zbavitën të pranishmit me pika muzikore nga folklori shqiptar, ndërsa me muzikë të lehtë të pranishmit i argëtuan grupi “XXL Band”.

Përveç karakterit promovues, garues dhe zbavitës, ky manifestim kishte edhe karakter humanitar. Mjetet e grumbulluara vullnetarisht nga ana e qytetarëve do të shkojnë për fëmijët e dëshmorëve të flamurit.

Zyra për implementim të projekteve pranë Komunës së Gostivarit, falënderon të gjithë ata të cilët dhanë kontributin e tyre për mbarëvajtjen e këtij evenimenti.